Всемогущий Владыко, премудрый и всеблагий Господи, светоначальнаго Сына Пребезначальный Родителю, и Животворящаго Духа Твоего вечный и присносущный Самоизводителю, Егоже величество неизчетно, слава несказанна, и милость безмерна, благодарим Тя, яко воззвал еси нас от небытия и почтил еси драгоценным образом Твоим, яко даровал еси нам недостойным не точию познавати и любити Тя, но еже сладостнейше есть, и Отцем своим нарицати Тя. Благодарим Тя, Боже милосердия и щедрот, яко преступивших заповедь Твою не оставил еси нас посреди греха и сени смертныя, но благоволил еси Единороднаго Твоего Сына, Имже и веки сотворены суть, послати на землю нашего ради спасения, да вочеловечением Его и страшными страданьми мучительства диаволя и тли смертныя свободимся. Благодарим Тя, Боже любве и сил, яко, по вознесении на небо дражайшаго Спасителя нашего, умолен быв Крестом Его, низпослал еси и Духа Твоего Пресвятаго на избранные Его ученики и апостолы, да, силою богодухновенныя проповеди их, озарят весь мир нетленным светом Евангелия Христова. Сам убо, Человеколюбивый Владыко, услыши ныне смиренную молитву недостойных чад Твоих, да якоже создал еси нас за едину Твою благость, искупил еси ны за едино благоутробие Твое, тако и спасеши нас по единому безприкладному милосердию Твоему: зане от дел наших ниже следа спасения имамы, но чаяние праведныя мести и отлучения от пресветлаго лица Твоего: аще бо и о едином праздном глаголе взыскано будет в день Суда и испытания, о неизчетных наших беззакониях, имиже согрешихом пред Тобою, кий, бедные, имамы воздати ответ; сего ради весьма от дел наших отчаявшеся оправдания, к Твоей единей, всяк ум и всяко слово превосходящей, прибегаем благости, юже, аки твердое основание надежды имуще, молим Тя: согрешихом, очисти, Господи! Беззаконновахом, прости, Владыко! Прогневахом Тя, примирися, Долготерпеливе! И сохрани прочее ум, совесть и сердце наше от скверн мирских, избави и спаси ны от многомятежныя бури страстей и грехопадений, вольных же и невольных, ведомых и неведомых, и в тихое управи пристанище веры, любви и упования жизни вечныя. Помяни нас в милости Твоей, Господи, даруй нам вся, яже ко спасению, прошения, паче же чистое и безгрешное житие; сподоби нас любити Тя, и боятися от всего сердца нашего, и творити во всем волю Твою святую, молитвами Пречистыя Владычицы нашея Богородицы и всех святых Твоих, яко Благ и Человеколюбец Бог еси, и Тебе славу и благодарение и поклонение возсылаем, со Единородным Твоим Сыном, и со Пресвятым и Благим и Животворящим Твоим Духом, ныне и присно, и во веки веков. Аминь.
